Autonomía

PRECEDENTES A L’AUTONOMÍA ASTURIANA

Encarase anguaño cola problemática autonomista y los graves defeutos de fondo y forma qu’acostina nun ye daqué que se puea xustificar con una güeyá. La hestoria ye llarga, la preautonomía, l’actuación del Conseyu Rexonal, les tresferencies y agora la esbilla del camín 143 de la Costitución pal algame l’autonomía, tienen unos protagonistes na más: los partíos parllamentarios. La so actuación no que cinca a los intereses de los trabayaores asturianos caltién-se per un tapecimientu la rialidá, negativa a devaluar so too les sos posibilidaes de movilización cara a entamos sopelexaos per ellos más emportantes (presión cara a los pautos de la Moncloa y presentar como ferramienta presión la so potencialidá movilizaora) y les sos conceciones ideolóxiques, la conceción del rexonalismu nel PCE y la negación de l’autonomía como necesidá nel PSOE, foi xustificau con un temor per parte d’ellos a facer el xuegu a los intereses de la drecha representaos, sigún l’atitú práutica de so, nel trabayu de Conceyu Bable y otros rexonalistes. Nun hebo inxamás un debate seriu per parte la mayoría los partíos y sindicatos so la comeniencia d’algamar l’autonomía, quedandose na más n’aspeutos puramente testimoniales —oportunistes—. L’aportación al debate autonómicu pue llendá-se al trabayu de Cueto Alas asoleyau en Avance-Intervención númberu 2, onde defende el conceutu de rexonalismu de clas, asimilau perbién pel PCE y que nun se igua con aportaciones nuees d’otros partíos. El abellugase nunca conceción teórica como la de Cueto Alas, foi la xustificación y al empar la coartá pa nun participar y torgar el debate plantiau ya cuantayá per Conceyu Bable nes páxines d’Asturies Semanal, la so llínia trabayu y les aportaciones de Arias en “Llingua y Sociedá asturiana” y “Bable y Regionalismo”.

Hai un fenómenu sociolóxicu d’emportancia curiosa que vién de un mitu deformaor de la rialidá seyendo un de les torgues más emportantes pal xorrecer de la concencia diferencial y l’afitamientu de so nunca marcación política: el covadonguismu, esti fenómenu de reconquista xustificaor de monarquíes y d’imperios y manera tapecía de mantener la hexemonía de les ideoloxíes dominantes foi usáu siempre y siempre dio resultaos, ye la fruta d’una desinformación secular o d’una información tendenciosa nes mesmes condiciones y abondo más alienante. Angüaño el convadonguismu ye l’enemigu primeru del rexonalismu asturián. Los partíos obreros nun fonon quién pa esaniciá-lu. La conceción internacionalista d’éstos ficieron de les lluches obreres de primeros del sieglu otres reconquistes, xustificable dafechu peles esixencies de los tiempos. Les embesties de los trabayaores asturianos escontra l’estau franquista de los años 62, 63 fueron tamién apuntaos como pertenecientes al mesmu destiín de reconquista d’Asturies. Naide foi pa mantener un frente de reconquista aplicau primero a la mesma Asturies y dempués tolo que ficiere falta. La izquierda nun foi pa aprender que dend’Asturies podía lleva-se una llucha qu’enfrentare al estau coles sos contradiciones (el casu de Euskadi y ETA) o nun lo fexeron, sinón limitáron-se a colocar les cadarmes asturianes de los sos partíos a la cabecera de les organizaciones a nivel de tol estau.

Hai un componente pertapecíu d’esta babaya creencia de ser los meyores y que foi la más emportante causa de que la llucha obrera menguara, aparte de la persecución policíaca y la represión, habría que la guetar nel desarrollismu tenocráticu que fexo qu’Asturies escalare puestos na renta per cápita y favoreció al nuestru Pais cola inversión pública (que si bien yera pelos intereses de la oligarquía, concibiendo ésta empresa como susidiaria de la empresa privá, obedeciendo al criteriu de socialización de pérdides y repartu ganancies. N’esplotaciones básiques, fuertemente especializaes en semiellaboraos, sin circuitos de produción integrales pala rentabilización de les empreses), toa esta inversión supuso puestos de trabayu enforma y en consecuencia la imigración aumentó. Los puestos de trabayu fueron rodeaos d’una falsa fama de lo que yerin estables y intocables, menguando la capacidá de llucha al poder tapecer la esplotación y dividir la clas obrera.

Ye’n medio la recesión cuando’l trabayaor da-se cuenta de que nun ye tal privilexau, y s’apauta a la llucha aumentando el nivel de concenciación y participación nes xeres sindicales y polítiques. Los partíos capaces de remanar esti potencial usáren-lu cuasimente na más pa fines elletorales, pela so probura d’idees y precisamente per negar na so prática plítica qu’Asturies tenía unos componentes diferenciaores a tener en cuenta en tolos frentes y precisamente el devaluar dellos fexo que partíos pequeños —MCA— crecieran anque’l so aparente dinamismu nun-ios quita ni un plizcu de la so susidiariedá ideolóxica. Nunca hebo nin la más pequeña posibilidá d’un frente de llucha específicamente asturianu, nin pa lluchar escontra’l franquismu o mesmamente pa facer afondar el procesu democráticu. La gran hestoria de llucha de los partíos d’izquierda conviérte-se nuna nuea versión de reconquista con un fin más emportante: el internacionalismu entendíu como la necesidá de colocar a la clas obrera asturiana a la cabecera d’esti papel de comparsa y xustificación de la democracia burguesa.

Les proclamaciones fundamentales de Conceyu Bable, BABLE NES ESCUELES – AUTONOMÍA DAFECHU, quedaren, per tar la sociedá asturiana enforma desinformá pelos 40 años de ditaúra y tracamundiu de la enformación d’unos partíos qu’asoleyaren la so intención y capacidá pa facer tolo que fuera “asturianista” fora de les sos conceciones d’asturianismu, yera sospechoso y secundario y per nun tar sofitaes pelos medios de comunicación nin dengún muérganu de poder, en puru voluntarismu en cuanto a poder da-ios un cuerpu políticu, na más llegó a fasteres pequeñes de la sociedá asturiana. La espresión más ñidia d’esi voluntarismu ye l’atuación cuasi siempre ambivalente de C B, que sin invalidar los finxos nos que s’afita obligaba a una atuación tamién delles vegaes tapecía pela mesma composición y procedencia de los sos socios y la cadarma l’asociación: universitarios y estudiantes encadarmaos en conceyos autónomos ú los discutinios yerin menguaos, ú nun se podía esixir una disciplina (pel propiu cálter l’asociación), seyendo tarrén afayaízu p’espoxigar ácrates. Dientro d’esti contestu: Conceyu Bable inxamás se definió como grupu de clas, procedencia elitista, etc., hebo una razón que-i permitió entamar a salir del so voluntarismu pasando a defender na práutica una postura de clas al ampliase’l so campu pela entrá de trabayaores, diversificando les sos posibilidaes y aumentando les sos contradiciones. CB yera conocíu dende fora precisamente pelos aspeutos reacionarios que los sos enemigos-i aplicaben y yerin remanables con facilidá, interclasismu, culturalismu, folclorismu… L’acusación yera al empar la posibilidá de tapecer los oxetivos fonderos, afitándo-se na más na imaxen de delles persones representatives d’él.

A pesar de toles torques, CB fexo xorrecer y alitar una conceción de rexonalismu qu’aportó otres posibilidaes d’ación (anguaño el PCE revisa la so conceción del rexonalismu d’anantes y pasa a defender el que CB simpre defendió), entamó y favoreció el debate so la custión nacional n’Asturies y costituyó el primeru y más emportante ñucleu encadarmau de nacionalistes.

Esti panorama yera enforma probe pa poder pedi-i algamar dalgún resultau positivu, la probeza del debate yera la muestra y la rialidá nun aportaba na ñueo. L’autonomía nun interesaba, a lo más amitía-se una conceción economicista que pretendía arbitrar maneres de vixilancia y partipación na xestión de les empreses públiques afitaes n’Asturies a traviés de los sindicatos, custión peremportante pero non única. Si bien dientro’l contestu la democratización del estau, el control de la empresa pública pelos trabayaores ye vital, hai munches otres xeres a facer p’algamar la so democratización dafechu, entamando pela necesidá de faer que tolos trabayaores participen —esto ye, democráticamente— dientro d’una dinámica de llucha como únicos protagonistes.

Los partíos d’izquierdes asturianos nun fueron quien pa entamar, pel so sucursalismu y funcionamientu burocráticu, a tiempu coles estayes necesaries pa permitir agora una verdaera democratización del aparatu estatal, como güei se ve, nun había frentes menos emportantes. Anden a la gueta de les causes que los faen apaicer como elementos casi estraños a la sociedá asturiana na más acetaos pelos sos militantes y simpatizantes (los votos son anteriores a la xestión). La rialidá d’esa dixebraúra y el faer políticu ve-se a les clares nel Conseyu Rexonal. Les razones tan precisamente nesi funcionamientu centralista y burocráticu, tando delles veces los intereses de los trabayaores asturianos tracamundiaos per otros non simpre fáciles de pescanciar, l’usu de la so fuercia como arma neutralizaora y l’abandonu de les necesidaes a plantiar dientro’l so ámetu de trabayu (paralización de dellos pozos cuando la detención de Carrillo anantes la llegalización del PCE, la rempuesta de los mesmos partíos y sindicatos al problema plantiau nel conflitu de Mines Figareu), siendo la mayoría los problemes específicos de los trabayaores asturianos nun contestaos de manera afayaíza.

N’Asturies nun na más hebo un debate autonomista sinón que nun hebo inxamás teoría revolucionaria identificable como asturiana dafechu, nin siquiera per partes, que fuere quién pa plantiar centíficamente les contradiciones de la sociedá asturiana, que cuayase nun cuerpu políticu basau nuna práutica d’esa teoría —militancia— y que movilizare a les mases. Les concesiones teóriques nun fueron específiques y la práutica tampoco, la esperiencia diz que nun valen dafechu. La función inteletual que tién que cumplir tou partíu revolucionariu cabezaleru y que sigún conferenciaba Gustavo Bueno hai 2 años en Mieres, desendolcaba na más el PCE, nun foi tala, nun aportó datos aprovechables a la rialidá asturiana nin so ella nin ellaboró unes directrices pa que la llucha de los trabayaores asturianos tuviere unes posibilidaes y efetividá rial. Los partíos nun na más dexaron de cumplir la so función de inteletuales de la clas trabayaora asturiana, sinón que se llendaron a valorar na más lo ya evidente (diendo siempre les sos valoraciones a xustificar el dir tres de la práutica), dexando güecu el llugar de cabezaleru y guía. Los peremportantes conflitos qu’hebo nestos caberos años, plantiaren custiones non iguaes, de la valoración de toos ellos los partíos nun paecen aportar grandes ensiñances que valgan de modelu p’afitar una estratexa que-i dexe avanzar en traza a la llucha n’Asturies, precisamente per nun tener un tratamientu específicu, inxería nun alrodiu específicu. Les posibilidaes que dexaríin que’l trabayaor asturianu fora protagonista dafechu y s’organizare tres una conceción de llucha ú xugaría el papel de clas dinámizaora, vanguardia proletaria y nacional, fonon desestimaes pelos partíos encargaos d’ello.

Asturies costituye un ámetu específicu de la griesca clases, ú la esplotación tien unos componentes que, anque nun esclusivos si son perfechamente identificables. La gran mayoría de la población ta proletarizá, la pergrande incidencia de la empresa estatal minera y siderúrxica y la sobreesplotación a la que tan sometíes les empreses filiales, sucontrates y la poca capacidá de resistencia del comerciu pela so dependencia unillateral dafechu. El ruin esporpolle de delles fasteres de la producción, campu, mar. Esta especifidá de la griesca clases bien afitá pela propia cadarma económica, qu’en sin depender d’Asturies, condiciona dafechu la vida y esporpolle de so.

A estes carauterístiques socioeconómiques non repetíes notres fasteres del Estau, nun se-i correspuenden tampoco unes rempuestes sindicales afayaices y específiques, per ser los sindicatos executores de les diretrices marcaos pelos mesmos partíos mayoritarios centralistes.

El que nun haiga estratexa autonomista nun se llenda a esti fechu esclusivamente, sinón que tien coherencia perfecha col trabayu desendolcau pelos partíos (toos centralistes), los sindicatos y el movimientu ciudadanu, remanaos per ellos.

Asturies tópa-se indefensa, l’aplicación del P E N y el P E G tien repercusiones pergraves, reconversiones con desmantelamientos de fasteres enteres, aumenta’l paru y les ofensives de la oligarquía centralista: Güelga la Costrución 77, Conflitu Figareu, La caber Güelga’l Tresporte. Marxinación arremente de l’aministración en tolo que mos cinca: tv, arradio, papeles, Sanidá: Hospital Xeneral y Siquiátricu, Oriente y Ocidente en sin cubrir les necesides elementales. Educación: política de tresllaos, guajes en sin escuela, maestros en paru, recortes de presupuestu a l’escuela pública y aumentu de suvenciones a la privá. Cultura: abandonu dafechu de la nuestra cultura popular, biblioteques, museos. El mantenimientu la marxinación la llingua asturiana.

L’AUTONOMÍA Y L’AUTOGOBIERNU

La grave crisis del capitalismu, en sin precedentes, cinca de manera peremportante al Estau español que paga al empar la recesión impuesta pela crisis enerxética mundial, espresión de la fondera crisis del capitalismu que necesita adatar les sos estrutures con otres maneres d’esplotación más rentables afitaes nuna redistribución del trabayu nel mundiu y articular estaos más amañosos, y el pesu del catastróficu desarrollismu tenocráticu de los caberos años la ditaúra. Nesti contestu y delantre la necesidá del capital monopolista de mantener los sos privilexos, la organización del estau esperimenta una atualización que-i dexe afitar la so hexemonía, aumentando la tasa de ganancies palo que tien que frenar les reivindicaciones de los trabayaores, principal causa de que les ganancies mengüen. Firmen-se pautos que dexen que la oligarquía gane tiempu y arremeten escontra los trabayaores emprobeciendo el so altor de vida, el so poder aquisitivu, mentes que se ponen na práutica los planes económicos PEN y PEG que suponen la entrá dafechu dientro les llendes de les multinacionales (enerxía ñuclear, endustria l’automóvil, GMC, Ford, etc.). L’estau pasa ser representante y executivu del capital monopolista imperialista y refuerza-se, siendo ca vegá más ayenu a la propia rialidá y elementu d’esplotación y represión de los trabayaores y más llugarteniente de les empreses multinacionales.

Nesti intre de crisis fondera del sistema capitalista, yera pernecesario el seguir cola adatación del estau franco-facista, modelu que ya nun valía, a otru que dexare seguir como anantes y que al empar tuviere más credibilidá. Atalantó-se’l democratizar l’estau y entamó-se la Reforma. La democratización del aparatu del estau pasaba pel pautu de la oligarquía española coles oligarquíes vasca y catalana que permitiere y xustificare el mantener la so dominación de clas, la defensa del so porgüeyu. Esti pautu implicaba los Estatutos d’Autonomía, pero dientro los Países Vascu y Catalán nun yera nin ye tola xente oligarquía, les clases populares nacionales, fonon los elementos dinamizaores que obligaren y obliguen al estau a guetar maneres nuees enfrentándolu coles sos contradiciones, pero los Estatutos nun podiin ser unos perdones a les oligarquíes dominantes, sinón a tola comunidá nacional de ca ámetu estatutariu. Esti plantiamientu suponía tener que ceder en parte a reivindicaciones nacionales de los trabayaores, y como consecuencia del avance d’eses reivindicaciones l’estau centralista tenía que delegar poderes a les oligarquíes vasques y catalanes y ente éstes y los sos dominaos surdíen ñidiamente les contradiciones de clas tapecíes nes lluches nacionalistes d’anantia. Los Estatuso suponen el menguar la concentración de poder nel estau oligárquicu centraliegu y pelo tanto les sos posibilidaes d’esplotación de les clases populares nacionales, la griesca clases entama llibrá-se nunes condiciones más favoratibles a los trabayaores.

Como consecuencia de los Estatutos más emportante ve-se entós la democratización del aparatu del estau y la posibilidá d’atropar otru modelu ñueu. L’autogobiernu permite l’averamientu de los centros de decisión y muérganos de poder a los trabayaores, que na medía de la operatividá d’esta autonomía —democratización efetiva del aparatu estatal—, tendrán conocencia de la correlación de fuercies en tou intre y podrán tamién controlar y esixir responsabilidaes a la xestión del so porgüeyu.

L’autogobiernu supón la posibilidá de la xuntura de les manzorgues delantre oxetivos ñidios cola consecuencia de mayor efetividá y póro d’afalamientu a la participación de tolos trabayaores. Afita y fai esporpollar la griesca clases dientro les llendes de la so xurisdición y en consecuencia supón un avance progresivu a un ñueu tipu de sociedá. Agora bien, ta perlloñe de ser un finxu cimeru, ye un pasu, y nel nuestru casu, va suponer la posibilidá d’una recuperación nacional dafechu a traviés del esporpolle la llucha y siempre afitá en toles aportaciones de la nuestra rialidá diferencial. L’encadarmamientu los trabayaores asturianos sigún l’espoxigue la so conciencia de clas, qu’espoxigará al empar de les situaciones que los obliguen a éllo (unidá enfrente a reivindicaciones concretes: rempuestes afayaices y encadarmaes de los trabayaores la Fábrica Mieres, los movimientos gremiales pala defensa d’intereses darreu, un usu y reivindicación de la llingua non coyuntural, sinón como manera natural de comunicación, etc.).

La conceción autonómica de los partíos n’Asturies ta lloñe de tar ñidia, o si lo ta’n teoría nun se correspuende cola práutica. Dientro’l PSOE supón na más una adatación a les esixencies hestóriques de los pueblos (casu vascu, catalán y gallegu). Palos otros pueblos nun hai denguna estratexa autonómica, na más el garrar lo que pues suponer un sofitu pal so hexemonía. Nun mos escaecemos que ye l’alternativa del poder y pelo tanto destinatariu del usu del estau.

Dientro’l PCE y a pesar de les sos pretensiones de xustificar ideolóxicamente la so manera facer les coses, al tratamientu d’anantes de “secundariedá” correspuende-i otru al autogobiernu, ye un componente dientro la so estratexa de la costrución del socialismu’n llibertá, nun acetable per coyuntural y per ser la mesma estratexa eurocomunista incapaz de facer progresar la sociedá d’anguaño a otra más llibre.

Palos demás partíos tien el mesmu cálter coyuntural, del que se fai usu p’algamar simples resultaos elletorales o capitalizables a curtiu plazu, en sin dengún compromisu per facer de l’autonomía un verdaeru frente de llucha, primero p’algam-la y dempués pa que l’usu del autogobiernu seya una participación dafechu dientro la griesca clases.

La pergrande incapacidá política de los análisis de los partíos asturianos nun invalida les posibilidaes del autogobiernu y si ye un esponente de la so política cegarata dafechu y centraliega siempre engarriá cola rialidá d’Asturies pela non reconocencia de la especifidá de la griesca clases.

LA PREAUTONOMÍA

Ya celebremos el cabudañu primeru de magar que mos truxeron el réxime preautonómicu. Esti réxime sería un elementu dinamizaor de la concencia autonomista si nun hubiere sío sofitáu a cencielles pelos partíos que sin denguna idea esclariá nun taben enfotaos na más que nel so porgüeyu elletoral y enforma más emportante l’atitú d’una izquierda temerosa de que l’autonomía fora un elementu a usar pela drecha o que favoreciere’l trabayu y espoxigue de grupos más radicales.

Al nun valorar en condiciones el poder aglutinante d’una verdaera llucha autonómica, escaeciéren-se d’élla. Nun na más s’escaecen d’élla sinón qu’abellugándose tres de xustificaciones ideolóxiques (conceción de rexonalismu enfrentáu a la rialidá de rexón, ú nun se pue faer astración de clases y unde la so viabilidá —el rexonalismu— tien que suponer la manifestación la griesca clases) creyeron y atuaron en consecuencia, que cualisquier entamu autonomiegu, fexére-se como se fexere tenía que valir pel fechu de salir de los protagonistes del pueblu sigún l’elletoralismu burgués. Les fasteres de l’izquierda en más grande o pequeña medía, sopelexáben-se a si mesmos salvaores y aglutinante de tola rialidá (o meyor futuru) y hestoria asturiana, motor d’una política enquivocá fora’l trabayu direutu del propiu partíu, y al empar favoreció l’afitamientu les posibilidaes d’ación de la drecha.

La preautonomía yera ñidiamente un pasu más dientro la política autonomista los partíos. Nin hebo desplicación pública al solicitar el réxime preautonómicu, nin se fexeren calendarios de prioridaes o posibilidaes de frentes a cubrir. La participación popular nel frente autonómicu foi escaecía perque foi-lo tamién el frente autonómicu, tracamundiau pela conceción autonómica como un protocolu más, pela llerza de los partíos a vese descubiertos (en sin idees, en sin política concreta y consensuando…), más sero afitáren-se nunes posibilidaes siempre llenades peles conceciones ideolóxiques y práutiques de ca partíu y los finxos que taben dimpuestos a defender: autonomía aministrativa y escaecimientu arremente de cualisquier reivindicación defierencial.

Esta atitú política tenía’l sofitu los sindicatos mayoritarios UGT y CCOO que seguíin les polítiques de los partíos a los que taben xuncíos. Hebo delles esceciones pero non operatives al tener enforma con mantener un sindicalismu que valiere y en sin plantia-se la posibilidá d’ampliar dende les sos bases la necesidá d’autogobiernu.

Los partíos, delantre les posibilidaes d’ación qu’ellos mesmos foron escobiando, siempre charon la culpa de la falta puxu popular pel’autonomía a la falta de concencia suxetiva de la xente, pero la rialidá ta bien lloñe de ser asina, ye’l desdexamientu d’éllos lo que fai que nun haiga verdaera concencia suxetiva na xente. Ye entós el trabayu d’éllos, non informando de la función de l’autonomía y la necesidá de que seya lo más grande que se pudiere, desplicando-la dafechu y faciendo que tola xente interesao fora protagonista, el que condiciona tola voluntá autonomiega d’Asturies.

Son fechos como’l que Rafael Fernández, dellos meses anantes de ser presidente del Conseyu Rexonal, conferenciaba públicamente qu’Asturies nun necesitaba autonomía, lo qu’asoleya la voluntá autonomiega los partíos asturianos, o les declaraciones de Vega Escandón. Nun hebo enxamás el más pequeño enfotu’n movilizar a la xente pel’autonomía y les poques vegaes que se fexo, féxo-se mal arremente, nun yera tampoco per casualidá’l que se fexere asina, l’autonomía yera daqué secundario, ¿Cómo pue pescanacia-se que’l PSOE y PCE llevaren a la manifestación per Ensidesa a Avilés más de 100.000 persones y na más dos meses dempués pel’autonomía los mesmos partíos llevaren 8.000?, en dos meses los militantes nun escaecen la disciplina, el xacíu estratéxicu de la manifestación d’Avilés yera abondo dixebráu del de la manifestación autonomiega. La preautonomía foi la posibilidá d’ensayar la hexemonía d’unos partíos so otros, tenemos ende l’exemplu la carrera vieyos pala presidencia la Diputación.

Otra llaceria de la preautonomía que fexo ridiculizar l’autonomía, foi la inoperancia dafechu de les sos estituciones (Conseyu Rexonal) que si per un llau reconocía la so falta competencies, tomaba postures ñidiamente negatives sin desplicar nin per él nin pelos partíos presentes n’él (casu la postura nel casu’l tresporte). Perdió’l tiempu’n discutinios sin dengún xacíu políticu (perres a cobrar, títulos de conseyeros, etc.) y foi usáu siempre como elementu capitalizable pala política los partíos.

Hebo una aparente negociación de tresferencies que se llendó a dir a Madrid y esperar les bones concesiones del gobiernu, sin denguna desplicación de la marcha les negociaciones (propuestes, contrapropuestes, calandariu, cantidá, etc.). Les estituciones preautonómiques convirtiéron-se na imaxen viva de los partíos llantaos n’Asturies, cuasimente ayenes a la sociedá asturiana, cuano son el guañu del poder más grande, dempués del gobiernu cientral, n’Asturies. Nun hai entovía tresferencies, el primer paquete llegará-mos en xineru, y nun se sabe cuála ye la cuantía d’élles.

Dientro les estituciones nuestres el discutiniu pala ellaboración del estatutu autonomía féxo-se embaraxando la posibilidá d’un camín o d’otru, tornando ser l’imaxen del espíritu los sos protagonistes, sabiendo que’l plantiamientu’n si taba enquivocáu, per nun tar sofitau pela sociedá asturiana y non na más les direciones burocrátiques de los partíos, y nun tar fechu en base a l’autonomía necesaria, sofitá nuna valoración de la rialidá. Analizando públicamente y darreu les ventaxes y torgues de la vía esbillá. La correlación les fuercies nes estituciones y conceyos nun quita’l facer la valoración y entamar les campañes que ficieren falta pa guetar la concenciación y sofitu de la más grande cantidá posible xente al entamu autonómicu.

Pue resumi-se la preautonomía, más que na so xestión, na so salía: la ellaboración del Estatutu, pel artículu 143 de la Costitución, que supondrá na más una simple escentralización aministrativa, que yera lo que los partíos revisionistes defendieron siempre, que llegaliza la marxinación popular de la xestión y costrución del futuru de so. Mentes que dure l’asumir l’autonomía el PEN y el PEG serán aplicaos, Asturies será vítima una vegá más de los pautos secretos ente los partíos; y al finar el camín toparémos-nos en sin autonomía política verdaera, sin poder llexislar lo que mos cinque de l’empresa pública, control del aforru de nuestru, de la sanidá, ensiñanza, seguridá social, trabayu, etc.

Asturies úsa-se una vegá más pa esperimentar una autonomía sele, remanatible con facilidá, que tién na más el nome, sin dengún contéu políticu, y que val na más pa xustificar la xestión d’unos partíos, que pasu ente pasu van dexebrándo-se de la so rialidá.

ASPEUTOS MÍNIMOS QUE TIEN QUE CONTEMPLAR L’ESTATUTU

L’estatutu tién que tar sofitau nun estudiu de la rialidá económica, política y cultural asturiana, tien que se desendolcar dientro les llendes del artículu 151 de la Costitución, únicu que dexa la posibilidá d’algamar una autonomía viable y los debates pala so fechura y redación dafechu tienen que se facer de manera bierta y ente toles fasteres de cálter asturianes.

Al empar ye pernecesario la conocencia pública de la marcha les negociaciones so l’autonomía a tolos niveles, les contraprestaciones a toles negociaciones y el contéu y algame’l consensu ente los partíos qu’intervinieren na ellaboración del estatutu. L’asoleyamientu del calandariu de feches y finxos a algamar.

El esporpolle’l trabayu autonómicu hai que lo llendar en tres frentes fonderamente:

ASPEUTOS POLÍTICOS

Dientro d’una aplicación de l’autonomía dafechu debería contempla-se la perdifícil andaúra autonómica de la man d’unos partíos que nun son nin ellos mesmos autónomos, pela práutica política diaria, pel so pasau. Ye pernecesario que los partíos seyan autónomos.

Habrá una Asamblea Llexislativa (parllamentu) ú seya posible la participación d’un más grande númberu de fuercies que respuenda’l pluralismu rial del País. Esti parllamentu tién que se llamar XUNTA XENERAL D’ASTURIES. Tendrá tamién gobiernu (Conseyu d’Asturies) y presidente gobiernu. La Xunta Xeneral deberá llexislar en tolos asuntos que nun seyan competencia del estau central: política internacional, exércitu, relaciones internacionales, etc.

Dientro’l poder xudicial, deberá contemplar la costitución d’un TRIBUNAL SUPERIOR ASTURIANU, que permita’l convocar oposiciones a Xueces, Maxistraos y Secretarios asina como tol personal necesariu pal funcionamientu’l poder xudicial, pa los llugares ú haiga places dientro les llendes de la comunidá.

Deberá tamién prever la recuperación de les tradicionales maneres d’execución asturianes, sigún el drechu consuetudinariu tradicional.

Na redación hai que tener en cuenta la terminoloxía que nun suponga una discriminación nacionalidá-rexón, y tién que pronuncia-se pela condición de nacionalidá d’Asturies.

Al ser Asturies un territoriu d’una provincia, deberá esanicia-se la diputación, pasando los sos medios a depender dafechu del Conseyu d’Asturies. Asina como la posibilidá de control ente les delegaciones de los ministerios que nun haigan tresferíu competencies.

Tien que contemplar el que delles comarques, n’otros tiempos d’aministración asturiana, puean enserta-se dientro la comunidá asturiana, previa petición d’élles. Al empar tien que dexar bien ñidio que la posibilidá de xuntura ye coles comarques notros tiempos asturianes y inxamás con otres rexones.

Dientro les competencies tién que haber un control de los medios de comunicación n’Asturies pela Xunta Xeneral, papeles, arradio y tva.

L’estatutu tién que dexar que la Xunta faiga los ordenamientos territoriales que-i peten pa poder iguar los pergraves desequilibrios dientro d’Asturies.

Dientro l’Estatutu tien que habetar recoyía una llei elletoral pal conceyu llesislativu que seya ferramienta de garantía democrática y que permita la configuración del Conceyu llexislativu de manera que tean representaos nél toles fuercies democrátiques asturianes.

Tien que contemplar tamién l’esporpolle l’articulau y les competencies d’anantes de la entrá en vigor del Estatutu del estau central no que cinca a les necesidaes sanitaries d’Asturies, sigún estudios afayaízos y les lleis que dexen la xestión de los presupuestos de la Seguridá Social en manes asturianes.

ASPEUTOS ECONÓMICOS

Deben gueta-se convenios económicos ente la comunidá y el gobiernu central que pasen per un control de les produciones de fierro y carbón usaos pel gobiernu como arma estratéxica pa compensar la balanza pagos, asina como arbitrar al empar que coles lleis que seyan menester pal control de les empreses públiques afitaes n’Asturies. Control del réxime mineru y enerxéticu.

Tien que contemplar la crianza d’una Facienda asturiana. La crianza d’un sistema tributariu propiu, que nun suponga una sangria a les menguaes condiciones de vida de los trabayaores. Deberá contemplar la posibilidá d’emisión de deuda pública col fin de financiar gastos d’inversión, cola posibilidá d’invertir pala reconversión de los procesos de produción de les empreses básiques y completar los ciclos, posibilitando asina un relanzamientu de la economía asturiana. Col mesmu enfotu habría que criyar un Estitutu de Fomentu con cálter de fastera pública que canalice les inversiones, so too del aforru asturianu, pa que la economía asturiana esporpolle más armónicamente, y tolos recursos produtivos puean ser aprovechaos.

Ye emprescindible y a partir de lleis que lo fagan posible, la participación de la Xunta Xeneral na xestión de la empresa pública estatal afitá n’Asturies pa escentralizá-la y esaniciar la so mala xestión y poder faer con ella un verdaeru motor d’esporpolle y non la causa fondera de la pergrave crisis de so y un sofitu más pa facer un modelu económicu que valga pal futuru.

Dientro d’esi mesmu modelu hai que contemplar el llabor a facer col campu y el mar pa que xueguen el emportante papel que-ios queda per facer.

L’esporpolle l’articuláu tien qu’arbitrar medíes operatives dientro una ordenación del territoriu pala so rentabilidá económica, estudiu pastos, cultivos, etc., afayaíces pala cadarma minifundista y aplicá so too al aprovechamientu vegues, montes comuñeros y puertos, diendo a maneres que valgan anguaño amestaes con otres esperimentaes notros tiempos (como’l sistema repoblación forestal en dellos Conceyos cuando la Xunta Xeneral que se facía pelos vecinos de les parroquies que teniin que plantar un númberu árboles y especies que-ios proporcionaba’l Conceyu).

Tien que contemplar la xestión y control dafechu del aforru asturianu (caxa d’Aforros y caxa Rural) y la so inversión n’Asturies, asina como la gueta d’otres maneres d’inversión.

Dientro les competencies del Estatutu, hai qu’atender de manera afayaíza a les relaciones comerciales internes y esternes d’Asturies ya que la so cadarma (poques defenses pela so dependencia de la empresa pública tal como funciona nel nuestru País, cola so conceción susidiaria de la empresa privá y el so valor estratéxicu persensible a les flutuaciones de les crisis internacionales), esixen una nuea conceción y aplicación.

Dientro la xestión la Facienda Asturiana, ésta encargará-se de cobrar los impuestos que-i correspuenderíin facer a la delegación del Ministeriu n’Asturies, faciendo dempués el pagu de manera global y tien que quedar bien afitao nos convenios económicos que se faigan ente l’estau y Asturies.

La Facienda tendrá ingresos: de les aportaciones de los conceyos, los empuestos que ponga y sopelexe afayaízo, la parte que-i correspuenda de los presupuestos xenerales del estau, les emisiones de deuda pública propia. Amás arbitrará-se a partir de la xestión pela Xunta de la empresa pública y na medía qu’esi control seya dafechu nel tiempu, una cuota de compensación pela esplotación dientro Asturies (canon del carbón nos conceyos, un canon de compensación pelos estragos de la contaminación, etc.).

ASPEUTOS CULTURALES – EDUCACIÓN

Seyendo los aspeutos culturales elementales na costitución d’una autonomía verdaeramente efetiva y la educación la posibilidá de faer rialidá un frente de vanguardia dientro la griesca clases, l’estatutu tien que atender a estos temes fonderamente.

La llingua asturiana como únicu camín pa salir de la llaceria na que s’atopa deberá tener cálter de llingua oficial col castellán y espresar que tolos asturianos tienen drechu al so usu y conocencia con tolo qu’esto conlleva d’aperiar los muérganos d’autogobiernu de capacidá (funcionariau, burocracia, etc.) pa llevar a la práutica el billingüismu. Asina mesmo contemplará la istitucionalización de l’Academia de la Llingua Asturiana, como muérganu consultivu y de resolución nos temes que cinquen al usu de la llingua.

N’ensiñanza fai falta la crianza d’un DISTRITU UNIVERSITARIU p’Asturies, ú la Universidá asturiana seya autónoma y s’ameste a les necesidaes de la sociedá asturiana.

La educación tién que se planificar dientro la marcación llegal del Estatutu. La correlación de fuercies permitirá unos planes d’ensiñanza que s’averen a les verdaeres necesidaes d’una ensiñanza racionalizá y ca vegá más popular. Amás tien que se facer a tolos niveles, dende prescolar a nivel universitariu, pasando pela profesional y la crianza d’asinatures específicamente asturianes pala so ensiñanza nes escueles.

Tien que contemplar tamién les resoluciones y financiación de la investigación centífica, el so fomentu y la so propiedá.

Dientro les competencies lexislatives de la Xunta tarán el aperiar les lleis que fagan falta pala catalogación de to el Patrimoniu Hestóricu Artísticu, monumental y arqueoloxicu, asina como la artesanía y les belles artes. Iguaráse la crianza del Museu Arqueoloxicu de Asturies y el Museu Asturianu de Belles Arts, asina como una Escuela Artesanal.

L’Istitutu de la Cultura Asturiana entamará por la recuperación, investigación y popularización de la cultura asturiana.

Conceyu Nacionalista Astur


Publicáu en: Autonomía, Conceyu Nacionalista Astur (CNA). Mieres, 1980, 22 páxines. Edición n'asturianu y en castellanu.
Fonte: Biblioteca d'Asturies, Sección Asturiana, Colección Asturiana, Ast C 110-9.
Dixitalización: El cielu por asaltu.